നോട്ടിംഗ്ഹാം:ഇംഗ്ലണ്ടിനെതിരെയുള്ള മൂന്നാം ടെസ്റ്റിലെ ജയം കേരളത്തിലെ പ്രളയ ദുരിതത്തിലകപ്പെട്ടവര്‍ക്കായി സമര്‍പ്പിച്ച് ടീം ഇന്ത്യയുടെ നായകന്‍ വിരാട് കോഹ്ലി.കേരളം ഇപ്പോള്‍ വിഷമഘട്ടത്തിലൂടെയാണ് കടന്ന് പോകുന്നതെന്നും ഇന്ത്യന്‍ ടീമെന്ന നിലയില്‍ ഇത് ചെയ്യേണ്ടത് കടമയാണെന്നും വിരാട് കോഹ്ലി കൂട്ടിച്ചേര്‍ത്തു.ഇന്ത്യ ഇംഗ്ലണ്ട് ടെസ്റ്റ് സീരീസിലെ മൂന്നാം മത്സരത്തില്‍ ഇംഗ്ലണ്ടിനെ തോല്‍പ്പിച്ച ടീം ഇന്ത്യ ഇത്തവണത്തെ മാച്ച് ഫീസ് കേരളത്തിലെ ദുരിതബാധിതര്‍ക്കായി നല്‍കാനും തീരുമാനിച്ചു.
പതിനഞ്ച് ലക്ഷം രൂപയാണ് ഒരു മത്സരത്തില്‍ ഇന്ത്യന്‍ താരങ്ങള്‍ക്ക് ലഭിക്കുന്നത്.ഈ തുകയാണ് താരങ്ങള്‍ കേരളത്തിലെ ദുരിതാശ്വാസ പ്രവര്‍ത്തനങ്ങള്‍ക്കായി നല്‍കുക.ടീം അംഗങ്ങളുടെ മുഴുവന്‍ തുകയും ചേരുമ്പോള്‍ ഏതാണ്ട് രണ്ട് കോടിയോളം രൂപവരും.
ദൈവത്തിന്റെ സ്വന്തം നാട് അതിജീവനത്തിന്റെ പാതയിലാണ്.നിരവധിപേര്‍ അവര്‍ക്കൊപ്പം നില്‍ക്കുന്നു.ടീം ഇന്ത്യ എന്ന നിലയില്‍ ഞങ്ങളും അവര്‍ക്കൊപ്പമാണെന്നും ക്യാപ്റ്റന്‍ വിരാട് കോഹ്ലി പറഞ്ഞു.
