തൃപ്പൂണിത്തറ:കന്യാസ്ത്രീയെ പീഡിപ്പിച്ച കേസില്‍ ബിഷപ്പ് ഫ്രാങ്കോ മുളയ്ക്കല്‍ കുറ്റക്കാരനെന്ന് പോലീസ്.ബിഷപ്പിനെതിരെ ബലാല്‍സംഗക്കുറ്റം ചുമത്തി.നേരത്തേ ബിഷപ്പിനെ അറസ്റ്റ് ചെയ്തുവെന്ന വാര്‍ത്തകള്‍ വന്നെങ്കിലും രാത്രി 8 നാണ് അറസ്റ്റ് രേഖപ്പെടുത്തിയത്.ബിഷപ്പിനെ ഇന്ന് കോട്ടയം പോലീസ് ക്ലബില്‍ പാര്‍പ്പിക്കും.നാളെ 11 മണിക്ക് പാലാ കോടതിയില്‍ ഹാജരാക്കും.ബലാല്‍സംഗക്കേസില്‍ രാജ്യത്ത്
അറസ്റ്റിലാവുന്ന ആദ്യത്തെ ബിഷപ്പാണ് ഫ്രാങ്കോ മുളയ്ക്കല്‍.
അറസ്റ്റ് നടപടിക്രമങ്ങളുടെ ഭാഗമായി ബിഷപ്പിന്റെ സ്ഥാന വസ്ത്രങ്ങള്‍ മാറ്റി.പകരം പാന്റും ടീഷര്‍ട്ടും ധരിച്ചു.ബിഷപ്പിനെ തൃപ്പൂണിത്തറ താലൂക്ക് ആശുപത്രിയില്‍ വൈദ്യപരിശോധനയ്ക്കായി എത്തിച്ചു.
കന്യാസ്ത്രീയുടെ പരാതി ശരിയെന്നും ബിഷപ്പിനെതിരായ കൃത്യമായ തെളിവുകള്‍ ലഭിച്ചെന്നും കോട്ടയം എസ്പി ഹരിശങ്കര്‍ പറഞ്ഞു.ബലാല്‍സംഗം.ഭീഷണി,പ്രകൃതിവിരുദ്ധ പീഡനം എന്നീ കുറ്റങ്ങളാണ് ബിഷപ്പിനെതിരെ ചുമത്തിയിരിക്കുന്നത്.നാളെ പാലാ കോടതിയില്‍ ഹാജരാക്കുന്ന ബിഷപ്പിനെ മൂന്നു ദിവസത്തെ കസ്റ്റഡിയില്‍ വിട്ടുകിട്ടാന്‍ ആവശ്യപ്പെടുമെന്നും എസ്പി പറഞ്ഞു.
അതേസമയം വൈദ്യപരിശോധനയ്ക്കായി ആശുപത്രിയിലെത്തിച്ച ബിഷപ്പിനെതിരെ കൂക്കുവിളികളോടെയാണ് ആളുകള്‍ പ്രതിഷേധിച്ചത്.
