പാലാ: 61-ാമത് സംസ്ഥാന സ്‌കൂള്‍ കായികമേള ഇന്ന് പാലായിൽ സമാപിക്കും. സമാപനം വൈകിട്ട് 4.30ന് സ്റ്റേഡിയത്തില്‍ നടക്കും. പ്രതിപക്ഷ നേതാവ് രമേശ് ചെന്നിത്തലയാണ് സമാപന സമ്മേളനം ഉദ്ഘാടനം ചെയ്യുക. കെ.എം.മാണി എംഎല്‍എ അധ്യക്ഷത വഹിക്കും. വിദ്യാഭ്യാസ മന്ത്രി പ്രഫ്.രവീന്ദ്രനാഥ് സമ്മാനം വിതരണം ചെയ്യു.
75 ഇനങ്ങളാണ് ഇതുവരെ പൂര്‍ത്തിയായ മീറ്റില്‍ എറണാകുളം ബഹുദൂരം മുന്നിലാണ്. 22 ഇനങ്ങള്‍കൂടി ഇനി പൂര്‍ത്തീകരിക്കേണ്ടതുണ്ട്. പാലക്കാടാണ് രണ്ടാം സ്ഥാനത്തും കോഴിക്കോട് മൂന്നാം സ്ഥാനത്തുമാണ് നിലവിൽ. സ്‌കൂളുകളില്‍ മാര്‍ബേസില്‍ എച്ച്.എസ്.എസ് കോതമംഗലമാണ് മുന്നില്‍ നില്‍ക്കുന്നത്.
നാലു പ്രകടനങ്ങളാണ് മീറ്റില്‍ ഇതുവരെ ദേശീയ റെക്കോര്‍ഡുകള്‍ മറികടന്നത്. ലോങ് ജംപില്‍ സാന്ദ്രാബാബു, ആന്‍സി സോജന്‍, 3000 മീറ്റര്‍ ഓട്ടത്തില്‍ അനുമോള്‍ തമ്പി, 5000 മീറ്റര്‍ ഓട്ടത്തില്‍ അജിത്ത് പി.എന്‍. എന്നിവരാണ് ദേശീയ റെക്കോര്‍ഡ് മറികടന്നത്.
സമാപനത്തോടനുബന്ധിച്ച് മീനച്ചില്‍ താലൂക്കിലെ ഹയര്‍സെക്കന്‍ഡറി വരെയുള്ള എല്ലാ ഗവ. എയ്ഡഡ്, അണ്‍ എയ്ഡഡ് സ്‌കൂളുകള്‍ക്കും ജില്ലാ കളക്ടര്‍ അവധി പ്രഖ്യാപിച്ചു.
