പമ്പ:മണ്ഡല പൂജയ്ക്ക് ശേഷം ശബരിമല നട ഇന്ന് അടയ്ക്കും.തുടര്‍ന്ന് മകരസംക്രമ പൂജകള്‍ക്കായി മുപ്പതിന് വീണ്ടും തുറക്കും.ഇന്ന് ഉച്ചയ്ക്ക് പന്ത്രണ്ട് മണിക്ക് തങ്ക അങ്കി ചാര്‍ത്തി മണ്ഡല പൂജ നടക്കും.രാത്രി പത്തിന് ഹരിവരാസനം പാടി നടയടക്കും.
ആറന്‍മുള പാര്‍ത്ഥസാരഥി ക്ഷേത്രത്തില്‍ നിന്ന് പുറപ്പെട്ട തങ്ക അങ്കി ഘോഷയാത്ര ഇന്നലെ വൈകിട്ടാണ് സന്നിധാനത്ത് എത്തിച്ചേര്‍ന്നത്.തുടര്‍ന്ന് തങ്ക അങ്കി ചാര്‍ത്തിയുള്ള ദീപാരാധന നടന്നു.
സ്ത്രീപ്രവേശന വിധിയേത്തുടര്‍ന്ന് പ്രതിഷേധങ്ങളും സംഘര്‍ഷങ്ങളും നിറഞ്ഞ ഒരു മണ്ഡല കാലമാണ് കഴിഞ്ഞുപോവുന്നത്.ഒറ്റയ്ക്കും സംഘമായും നിരവധി യുവതികള്‍ ശബരിമലദര്‍ശനത്തിനായി എത്തിയെങ്കിലും പ്രതിഷേധങ്ങളെത്തുടര്‍ന്ന് എല്ലാവര്‍ക്കും മടങ്ങിപ്പോവേണ്ടിവന്നു.പ്രശ്‌നങ്ങള്‍ കാരണം മുന്‍ വര്‍ഷങ്ങളെ അപേക്ഷിച്ച് ശബരിമലയിലെ വരുമാനത്തില്‍ വലിയ കുറവുണ്ടായതായി ദേവസ്വം ബോര്‍ഡ് പ്രസിഡന്റ് തന്നെ പറഞ്ഞിരുന്നു.
