ഡല്‍ഹി:ഇന്ത്യയുടെ അഭിമാനമായ എയര്‍ഫോഴ്‌സ് വിങ് കമാന്‍ഡര്‍ അഭിനന്ദന്‍ വര്‍ധമാനെ പരിഹസിച്ച് പാക്കിസ്ഥാനില്‍ ക്രിക്കറ്റ് പരസ്യം.പാകിസ്ഥാനില്‍ ലോകകപ്പ് സംപ്രേഷണം ചെയ്യുന്ന ജാസ് ടിവിയാണ് ജൂണ്‍ 16ന് നടക്കുന്ന ഇന്ത്യ-പാകിസ്ഥാന്‍ മത്സരത്തിന് മുന്നോടിയായി പരസ്യം പുറത്തിറക്കിയത്.ബാലക്കോട്ട് വ്യോമാക്രമണത്തിനു പിന്നാലെ പാകിസ്ഥാന്റെ പിടിയിലായ അഭിനന്ദനെ ചോദ്യം ചെയ്യുന്നതിനിടെ പുറത്തിറക്കിറക്കിയ വീഡിയോയ്ക്കു സമാനമായാണ് പരസ്യവും ചിത്രീകരിച്ചിരിക്കുന്നത്.അഭിനന്ദന്‍ വര്‍ദ്ധമാന്റെ മീശയുള്‍പ്പെടെ രൂപ സാമ്യമുള്ള ഒരാള്‍ നീല ജഴ്‌സിയിട്ട് കൈയ്യില്‍ ചായകപ്പുമായി സംസാരിക്കുന്നതാണ് പരസ്യത്തിലുള്ളത്.
ടോസ് നേടിയാല്‍ ഇന്ത്യയുടെ പ്ലയിംഗ് ഇലവനെയും കളി തന്ത്രങ്ങളെയും കുറിച്ച് ചോദിക്കുമ്പോള്‍ പാക് തടങ്കലില്‍ ചോദ്യം ചെയ്യലിനിടയില്‍ അഭിനന്ദന്‍ പറഞ്ഞപോലെ അയാം സോറി, അക്കാര്യം പറയാന്‍ എനിക്ക് അനുമതിയില്ലെന്ന് പറയുന്നു.ചായ എങ്ങനെയുണ്ടെന്ന ചോദിച്ചപ്പോള്‍ ചായ നല്ലതായിരുന്നെന്നും പരസ്യത്തില്‍ അഭിനയിക്കുന്ന് ആള്‍ ഉത്തരം പറയുന്നു.ഇനി താങ്കള്‍ക്ക് പോകാമെന്ന് പറയുന്നതോടെ കപ്പുമായി എഴുന്നേല്‍ക്കുന്ന ഇദ്ദേഹത്തോട് കപ്പും കൊണ്ട് എവിടേക്കാണ് പോകുന്നതെന്ന് ചോദിച്ച്,കപ്പ് ഇവിടെ വെച്ചിട്ട് പോകൂ എന്ന് ഹാഷ് ടാഗിലൂടെ പരിഹസിച്ചാണ് പരസ്യം അവസാനിക്കുന്നത്.ഇന്ത്യയെ അപമാനിക്കുന്നതുകൂടാതെ ക്രിക്കറ്റ് ലോകകപ്പ് ഇത്തവണ പാക്കിസ്ഥാന്‍ സ്വന്തമാക്കുമെന്ന് ധ്വനികൂടിയാണ് പരസ്യത്തിലുളളത്.പരസ്യത്തിനെതിരെ ഇന്ത്യയില്‍ വ്യാപകപ്രതിഷേധമാണുയരുന്നത്.
