പ്രായം കൂടുന്തോറും ചെറുപ്പമാകുന്നുവെന്നത് മലയാളികളുടെ മെഗാസ്റ്റാര്‍ മമ്മൂട്ടിയെക്കുറിച്ച് മാത്രം പറഞ്ഞുകേള്‍ക്കുന്ന ഒന്നാണ്.ചെറുപ്പത്തില്‍ തന്നെ നരകയറി വയസ്സരാകുന്ന ഇപ്പോഴത്തെ തലമുറയെ അദ്ഭുതപ്പെടുത്തുന്ന താരം.മമ്മൂട്ടി പുതുതായി ഫേസ്ബുക്കില്‍ പോസ്റ്റ് ചെയ്ത ചിത്രം കണ്ട് കേരളത്തിലെ യുവാക്കള്‍ അന്തംവിട്ടിരിക്കുകയാണ്.മുടി നീട്ടിവളര്‍ത്തിയ പുതിയ ലുക്കില്‍ അതിരപ്പള്ളി വെള്ളച്ചാട്ടത്തിന്റെ പശ്ചാത്തലത്തില്‍ മമ്മൂട്ടി നില്‍ക്കുന്ന ചിത്രമാണ് ഇപ്പോള്‍ സോഷ്യല്‍മീഡിയയിലെ ഹിറ്റ്.മമ്മൂട്ടി ഗസ്റ്റ് റോളില്‍ പ്രത്യക്ഷപ്പെടുന്ന ‘പതിനെട്ടാം പടി’ എന്ന ചിത്രത്തിലേതാണ് ഈ കിടിലന്‍ ഫോട്ടോ.
പ്രായത്തെ വെല്ലുന്ന ആ ലുക്ക് കണ്ട് രസകരമായ കമന്റുകളിട്ടവരുമുണ്ട്.
‘അറിയാന്‍മേലാഞ്ഞിട്ട് ചോദിക്കുവാ,,ഈ ഗെറ്റപ്പ്‌ചേഞ്ചസൊക്കെ നിങ്ങള്‍ക്ക് മാത്രം പറഞ്ഞിട്ടുള്ളതാണോ,,ഇതൊക്കെ കാണുമ്പോഴാണ് ചില പ്രമുഖന്‍മാരെയൊക്കെ എടുത്ത് കിണറ്റിലിടാന്‍ തോന്നുന്നത്.’നിങ്ങള്‍ എന്തൊരു ക്രൂരനാണ് മനുഷ്യാ… 37 വയസ്സില്‍ നിങ്ങളുടെ വാപ്പയാകാനുള്ള ലുക്കില്‍ ഞാന്‍ നടക്കുമ്പോള്‍ എന്റെ വാപ്പാനെക്കാളും പ്രായമുള്ള നിങ്ങള്‍ എന്റെ മോന്റെ ലുക്കില്‍ ഫോട്ടോയിട്ട് കളിക്കുന്നു…’ ചിത്രം കണ്ട യുവാക്കളുടെ രോദനമാണ്.
ആഗസ്റ്റ് സിനിമാസിന്റെ ബാനറില്‍ ശങ്കര്‍ രാമകൃഷ്ണന്‍ ഒരുക്കുന്ന ചിത്രമാണ് പതിനെട്ടാം പടി.ആക്ഷന് പ്രാധാന്യമുള്ള ചിത്രത്തില്‍ ഗസ്റ്റ് റോളിലാണ് മമ്മൂട്ടി എത്തുന്നത്.
