മംഗളൂരു:കഫേ കോഫി ഡേ ഉടമയും മുന്‍ കര്‍ണ്ണാടക മുഖ്യമന്ത്രിയുമായ എസ് എം കൃഷ്ണയുടെ മരുമകനുമായ സിദ്ധാര്‍ത്ഥയെ കാണാതായി.ഇന്നലെ രാത്രിയാണ് സിദ്ധാര്‍ത്ഥയെ നേത്രാവതിപ്പുഴയില്‍ കാണാതായത്.പല സംഘങ്ങളായി തിരിഞ്ഞ് രക്ഷാപ്രവര്‍ത്തകര്‍ പുഴയില്‍ തെരച്ചില്‍ തുടരുകയാണ്.കമ്പനി നഷ്ടത്തിലായതിനെത്തുടര്‍ന്നുണ്ടായ സാമ്പത്തിക ബാധ്യത സിദ്ധാര്‍ത്ഥയെ അലട്ടിയിരുന്നു.ആദായ നികുതി വകുപ്പില്‍നിന്നും വലിയ സമ്മര്‍ദ്ദമുണ്ടായിരുന്നുവെന്നും കമ്പനി ലാഭത്തിലാക്കുന്നതില്‍ പരാജയപ്പെട്ടെന്നും കാണിച്ച് കഫേ കോഫി ഡേ ജീവനക്കാര്‍ക്ക് സിദ്ധാര്‍ത്ഥ അയച്ച കത്ത് പുറത്തുവന്നിട്ടുണ്ട്.
ഇന്നലെ രാത്രി ബംഗളൂരുവില്‍ നിന്നും മംഗളൂരിലേക്ക് പുറപ്പെട്ട സിദ്ധാര്‍ത്ഥ പുഴയുടെ അടുത്തെത്തിയപ്പോള്‍ കാര്‍ നിര്‍ത്താന്‍ ആവശ്യപ്പെടുകയും തുടര്‍ന്ന് പുഴയിലേക്കിറങ്ങുക യുമായിരുന്നെന്ന് ഡ്രൈവര്‍ പറയുന്നു.മഴ പെയ്ത് പുഴയിലെ ജലനിരപ്പുയര്‍ന്നതിനാല്‍ തന്നെ രക്ഷാപ്രവര്‍ത്തനം ദുഷ്‌കരമാണ്. ഇന്നലെ രാത്രി മുതല്‍ തുടങ്ങിയ തിരച്ചില്‍ ഇപ്പോഴും തുടരുകയാണ്.
