ന്യൂഡല്‍ഹി:എകസിറ്റ് പോള്‍ ഫലവുമായി ബന്ധപ്പെട്ട് നടന്‍ വിവേക് ഒബ്‌റോയിയുടെ ട്വീറ്റിനെതിരെ വ്യാപക വിമര്‍ശനം.ഐശ്വര്യ റായിയുടെ പ്രണയവും വിവാഹവും വിഷയമാക്കിയ ട്രോള്‍ സമൂഹമാധ്യമങ്ങള്‍ വലിയ ചര്‍ച്ചയാക്കിയതോടെ വനിതാ കമ്മീഷനും ഇടപെടുന്നു.സ്ത്രീത്വത്തെ അപമാനിച്ചതിന് മഹാരാഷ്ട്ര വനിതാ കമ്മീഷന്‍ വിവേക് ഒബ്‌റോയിക്ക് നോട്ടീസ് അയച്ചു.സ്ത്രീത്വത്തെ അപമാനിച്ചതിന് വിവേക് ഒബ്‌റോയിയെ അറസ്റ്റ് ചെയ്യണമെന്ന് എന്‍സിപി വനിതാ വിഭാഗം അധ്യക്ഷ ചിത്ര വാഗ് ആവശ്യപ്പെട്ടിരുന്നു.
സല്‍മാന്‍ ഖാനുമായും വിവേക് ഒബ്റോയിയുമായും ഐശ്വര്യ നില്‍ക്കുന്ന ചിത്രത്തിനൊപ്പം അഭിഷേക് ബച്ചനും മകളുമായി നില്‍ക്കുന്ന കുടുംബചിത്രവും ചേര്‍ത്ത് ഇന്നലെ പുറത്തുവന്ന എക്സിറ്റ് പോള്‍ ഫലങ്ങളെ കളിയാക്കുന്ന ട്രോള്‍ പവന്‍ സിംഗ് എന്നയാളാണ് നിര്‍മ്മിച്ചത്.ഇത് വിവേക് ഒബ്റോയ് ട്വിറ്ററില്‍ പങ്കുവെയ്ക്കുകയായിരുന്നു. ഐശ്വര്യ റായിയുടെ മൂന്ന് പ്രണയങ്ങള്‍ ഉള്‍പ്പെടുത്തിയിട്ടുള്ള മീം ആയിരുന്നു വിവേക് ഒബ്‌റോയി പങ്കുവച്ചത്. രാഷ്ട്രീയമല്ല ഇത് ജീവിതമാണ് എന്ന അടിക്കുറിപ്പോടെയാണ് ഐശ്വര്യയുടെ പ്രണയവും വിവാഹവും കഥയാക്കിയ ട്രോള്‍ വിവേക് ഷെയര്‍ ചെയ്തത്.സല്‍മാന്‍ ഖാനുമായുള്ള പ്രണയകാലത്തെ ചിത്രത്തിന് ‘ഒപീനിയന്‍ പോള്‍’ എന്നും വിവേക് ഒബ്‌റോയിയുമായുള്ള പ്രണയകാലത്തെ ചിത്രത്തിന് എക്സിറ്റ് പോള്‍ എന്നും അഭിഷേക് ബച്ചനും മകള്‍ക്കുമൊപ്പമുള്ള ചിത്രത്തിന് റിസല്‍ട്ട് എന്നും വിശേഷിപ്പിച്ചാണ് ട്രോള്‍.
സല്‍മാനുഖാനുമായുള്ള പ്രണയ പരാജയത്തെത്തുടര്‍ന്ന് ഐശ്വര്യ വിവേക് ഒബ്‌റോയിയുമായി പ്രണയത്തിലായെങ്കിലും ആ ബന്ധവും താമസിയാതെ തകരുകയായിരുന്നു.തുടര്‍ന്നാണ് ഐശ്വര്യ അഭിഷേ്ക് ബച്ചന്റെ ഭാര്യയായത്.
ട്രോള്‍ സമൂഹമാധ്യമങ്ങളേറ്റെടുത്തതോടെ വിവേക് ഒബ്‌റോയിക്കെതിരെ വ്യാപക വിമര്‍ശനമുയര്‍ന്നുകഴിഞ്ഞു. ബോളിവുഡ് താരമായ സോനം കപൂര്‍ അടക്കം നിരവധിപേര്‍ വിവേക് ഒബ്‌റോയിയുടെ ട്വീറ്റിനെ വിമര്‍ശിച്ചു.വിവേകമില്ലാത്ത ഒരാള്‍ക്ക് ആരാണ് വിവേക് ഒബ്റോയ് എന്നു പേരിട്ടതെന്നും വിമര്‍ശകര്‍ ചോദിക്കുന്നു.
