ഉറുമിക്ക് ശേഷം സന്തോഷ് ശിവന്‍ സംവിധാനം ചെയ്യുന്ന ചിത്രത്തിന്റെ പോസ്റ്റര്‍ പുറത്തിറങ്ങി. 16-ാം നൂറ്റാണ്ടില്‍ ജീവിച്ചിരുന്ന സാമൂതിരിയുടെ നാവിക പടനായകന്‍ കുഞ്ഞാലി മരയ്ക്കാരെ കുറിച്ചുള്ള സിനിമയില്‍ കുഞ്ഞാലി മരയ്ക്കാര്‍ നാലാമനായി മമ്മൂട്ടി വേഷമിടും.
ടി പി രാജീവന്‍- ശങ്കര്‍ രാമകൃഷ്ണന്‍ എന്നിവരുടെ തിരക്കഥയിലുള്ള ചിത്രം ആഗസ്റ്റ് സിനിമാസ് ആണ് നിര്‍മ്മിക്കുന്നത്. ആഗസ്റ്റ് സിനിമാസിന്റെ ഫേസ്ബുക്ക് പേജിലൂടെയാണ് പോസ്റ്റര്‍ പുറത്ത് വിട്ടിരിക്കുന്നത്. മമ്മൂട്ടിയുടെ ഒഫീഷ്യല്‍ പേജ് പോസ്റ്റ് ഷെയര്‍ ചെയ്തിട്ടുണ്ട്.
കേരളപ്പിറവി ദിനമായ ഇന്ന് രാവിലെയാണ് ആരാധകരെ ഞെട്ടിച്ചുകൊണ്ട് പോസ്റ്റര്‍ ഇറങ്ങിയത്. നിമിഷങ്ങള്‍ക്കുള്ളില്‍ പതിനായിരത്തിലധികം പേരാണ് പോസ്റ്റ് കണ്ടത്.
എന്നാല്‍ മോഹന്‍ലാല്‍-പ്രിയദര്‍ശന്‍ കൂട്ടുകെട്ടില്‍ വരാനിരിക്കുന്ന ചിത്രവും കുഞ്ഞാലി മരയ്ക്കാരുടെ ജീവിതം അടിസ്ഥാനമാക്കിയുള്ളതാണ്. ഇത് സിനിമാപ്രേമികള്‍ക്കിടയില്‍ ആശങ്കയ്ക്കിടയാക്കിയിട്ടുണ്ട്.
