തിരുവനന്തപുരം:മലയാളി ക്രിക്കറ്റ് താരം സഞ്ജു വി സാംസണ്‍ വിവാഹിതനായി.തിരുവനന്തപുരം സ്വദേശിയായ ചാരുലതയും സഞ്ജുവും തമ്മിലുള്ള വിവാഹം ലളിതമായ ചടങ്ങുകളോടെ കോവളത്തെ സ്വകാര്യ ഹോട്ടലില്‍ നടന്നു.അടുത്ത ബന്ധുക്കള്‍ മാത്രമാണ് വിവാഹച്ചടങ്ങില്‍ പങ്കെടുത്തത്.വൈകുന്നേരം വിപുലമായ രീതിയില്‍ വിവാഹസല്‍ക്കാരം നടക്കും.
മാര്‍ ഇവാസിയോസ് കോളജിലെ പഠനകാലത്താണ് സഞ്ജുവും ചാരുലതയും പ്രണയത്തിലാവുന്നത്.2013 -ല്‍ തുടങ്ങിയ പ്രണയം അഞ്ചുവര്‍ഷം രഹസ്യമാക്കി വച്ചശേഷം കഴിഞ്ഞ സെപ്തംബറിലാണ് സഞ്ജു ഫേസ്ബുക്കിലൂടെ വെളിപ്പെടുത്തിയത്.ഇരുവരുടേയും വീട്ടുകാരുടെ അനുവാദത്തിന് കാത്തിരിക്കുകയായിരുന്നെന്നാണ് സഞ്ജു ആരാധകരോട് പറഞ്ഞത്.
തിരുവനന്തപുരം വെങ്ങാനൂരില്‍ ഡല്‍ഹി പോലീസില്‍ ഉദ്യോഗസ്ഥനായിരുന്ന വിശ്വനാഥന്‍ സാംസണിന്റേയും ലിജിയുടേയും മകനാണ് സഞ്ജു. മാതൃഭൂമി തിരുവനന്തപുരം യൂണിറ്റ് സീനിയര്‍ ന്യൂസ് എഡിറ്ററായ ബി രമേഷ്‌കുമാറിന്റേയും എല്‍ഐസി തിരുവനന്തപുരം ഡിവിഷണല്‍ മാനേജര്‍ ആര്‍.രാജശ്രീയുടേയും മകളാണ് ചാരുലത.തിരുവനന്തപുരം ലയോള കോളജില്‍ എംഎ വിദ്യാര്‍ത്ഥിനിയാണ്.
