കൊച്ചി:ദിലീപ് വിഷയത്തില്‍ അമ്മ നേതൃത്വത്തിന്റെ വാദങ്ങളെല്ലാം പൊളിക്കുന്ന കൂടുതല്‍ തെളിവുകള്‍ പുറത്ത്.ദിലീപിനെതിരെ അമ്മ ഭാരവാഹിയായ ഇടവേള ബാബു തന്നെ പോലീസിന് മൊഴി നല്‍കിയിരുന്നു.സിനിമയിലെ തന്റെ അവസരങ്ങള്‍ ദിലീപ് നിഷേധിക്കുന്നുവെന്ന് ആക്രണത്തിനിരയായ നടി പരാതിപ്പെട്ടിരുന്നുവെന്നാണ് കേസന്വേഷണത്തിനിടെ പൊലീസിന് നല്‍കിയ മൊഴിയില്‍ ഇടവേള ബാബു വെളിപ്പെടുത്തിയത്.
നടിയുടെ പരാതിയില്‍ കുറച്ച് വാസ്തവമുണ്ടെന്ന് തനിക്ക് തോന്നിയിരുന്നതായും,ദിലീപിനോട് ചോദിച്ചപ്പോള്‍ ആവശ്യമില്ലാത്ത കാര്യങ്ങളില്‍ എന്തിനാണ് ഇടപെടുന്നതെന്നായിരുന്നു പ്രതികരണമെന്നും ഇടവേളബാബുവിന്റെ മൊഴിയില്‍ പറയുന്നു.ഏതൊക്കെ സിനിമകളില്‍ നിന്നാണ് ഒഴിവാക്കിയതെന്ന് നടി വ്യക്തമാക്കിയിട്ടില്ല.നടിയും ദിലീപും തമ്മിലുള്ള പ്രശ്‌നങ്ങള്‍ സംഘടന ചര്‍ച്ചചെയ്തിട്ടില്ലെന്നും ഇടവേള ബാബു പറയുന്നു.
കൊച്ചിയിലെ സ്വകാര്യ ഹോട്ടലില്‍ വച്ച് സ്റ്റേജ് ഷോ റിഹേഴ്സലിനിടെ ഇരയായ നടിയും കാവ്യാ മാധവനും തമ്മില്‍ വഴക്കുണ്ടായി.ഇതേത്തുടര്‍ന്ന് ദിലീപ് ഇരയായ നടിയോട് ദേഷ്യപ്പെടുകയും നടന്‍ സിദ്ദിഖ് പ്രശ്നത്തില്‍ ഇടപെട്ട് സംസാരിക്കുകയും ചെയ്തു.അതിനുശേഷം ഇരയായ നടിയും കാവ്യയും തമ്മില്‍ സംസാരിച്ചിട്ടില്ലെന്നും ഇടവേള ബാബുവിന്റെ മൊഴിയില്‍ പറയുന്നു.
