രാജ്യത്തിനെതിരെ നടക്കുന്ന തീവ്രവാദത്തിനെതിരെ പോരാടുന്ന കമാന്‍ഡോയുടെ കഥപറയുന്ന ചിത്രമായ ‘കറാച്ചി 81’ ഫസ്റ്റ്‌ലുക്ക് റിലീസ് ചെയ്തു. പൃഥിരാജിനൊപ്പം ടൊവിനോ തോമസും ചിത്രത്തില്‍ പ്രധാന വേഷത്തില്‍ എത്തുന്നുണ്ട്. നവാഗതനായ കെ.എസ്.ബാവയാണ് സിനിമ സംവിധാനം ചെയ്യുന്നത്. സിനിമയുടെ പ്രമേയവുമായി ബന്ധപ്പെട്ട ചില സൂചനകള്‍ കഴിഞ്ഞ ദിവസം പൃഥി സോഷ്യല്‍മീഡിയയില്‍ പങ്കുവച്ചിരുന്നു. സാറ്റലൈറ്റുകളും ഡിജിറ്റല്‍ സംവിധാനങ്ങളും ഇല്ലാതിരുന്ന കാലത്ത് യുദ്ധം നേരിട്ടവരുടെ കഥയുമായാണ് പൃഥി എത്തുന്നത്. ഇന്ത്യയ്‌ക്കെതിരെ പാക്ചാരസംഘടന ഐഎസ്‌ഐയുടെ നീക്കത്തിനെതിരെ ഇന്ത്യ നടത്തിയ ഏറ്റവും വലിയ ചാര ഓപ്പറേഷനാണ് കറാച്ചി 81 പറയുന്നത്. സുജിത്ത് വാസുദേവാണ് ഈ ചിത്രത്തിനുവേണ്ടി ഛായാഗ്രഹണം നിര്‍വ്വഹിക്കുന്നത്. ജേക്ക്‌സ് ബിജോയ് സംഗീതവും മഹേഷ് നാരായണന്‍ എഡിറ്റിംഗും നിര്‍വ്വഹിക്കുന്നു. ചിത്രത്തിന്റെ മറ്റു വിവരങ്ങള്‍ പുറത്തുവിട്ടിട്ടില്ല.
