തിരുവനന്തപുരം: യൂണിവേഴ്‌സിറ്റി കോളേില്‍ ബിരുദ വിദ്യാര്‍ത്ഥിയായ അഖിലിനെ കുത്തിയ കേസിലെ മുഖ്യപ്രതികള്‍ അറസ്റ്റില്‍. ഒന്നാം പ്രതി ശിവരഞ്ജിത്തും രണ്ടാം പ്രതി നസീമുമാണ് പിടിയിലായത്. കേശവദാസപുരത്ത് കന്റോണ്‍മെന്റ് പൊലീസാണ് ഇവരെ അറസ്റ്റ് ചെയ്തത്.കല്ലറയിലേക്ക് പോകാന്‍ ഓട്ടോയില്‍ കേശവദാസപുരത്ത് എത്തിയപ്പോഴാണ് ഇരുവരും പിടിയിലായത്. ഇതോടെ കേസില്‍ ആറുപേര്‍ അറസ്റ്റിലായിട്ടുണ്ട്.
സാക്ഷിമൊഴികളുടെ അടിസ്ഥാനത്തില്‍ എസ്എഫ്‌ഐ പ്രവര്‍ത്തകന്‍ ഇജാബിനെ നേരത്തേ അറസ്റ്റ് ചെയ്തിരുന്നു.ഇന്നലെ ആരോമല്‍,ആദില്‍,അദ്വൈത് എന്നിവരെ പിടികൂടി. ലുക്ക് ഔട്ട് നോട്ടീസിലുള്ള മൂന്നുപേര്‍ കൂടി ഇനി പിടിയിലാകാനുണ്ട്. ഇന്നലെ അര്‍ദ്ധരാത്രി പൊലീസ് യൂണിവേഴ്‌സിറ്റി കോളേജ് ഹോസ്റ്റലിലും സ്റ്റുഡന്റ്‌സ് സെന്ററിലും നടത്തിയ പരിശോധനയില്‍ ഇരുമ്പുദണ്ഡുകള്‍ ഉള്‍പ്പെടെ ആയുധങ്ങള്‍ കണ്ടെടുത്തു. മറ്റു മൂന്നു പ്രതികള്‍ക്കായി പോലീസ് അന്വേഷണം ഊര്‍ജിതമാക്കി.
