എറണാകുളം: യൂബര്‍ ഡ്രൈവറുടെ ഫോണും പണവും തട്ടിയെടുക്കാന്‍ ശ്രമിച്ച ട്രാന്‍സ് ജെന്‍ഡര്‍ സംഘം അറസ്റ്റില്‍. ഹൈക്കോടതി ജങ്ഷനില്‍ പുലര്‍ച്ചെ രണ്ടരയോടെ നടന്ന മോഷണ ശ്രമത്തിലെ പ്രതികളായ പത്തനംതിട്ട സ്വദേശി ഭൂമിക, വൈറ്റില സ്വദേശികളായ ശ്രുതി, സോനാക്ഷി, ചെങ്ങന്നൂര്‍ സ്വദേശി അരുണിമ, നെയ്യാറ്റിന്‍കര സ്വദേശി നിയ എന്നിവരെയാണ് സെന്‍ട്രല്‍ പോലീസ് അറസ്റ്റ് ചെയ്തത്.
ഏഴുപേരായിരുന്നു സംഘത്തിലുണ്ടായിരുന്നത്. രണ്ടുപേര്‍ക്കു വേണ്ടി തിരച്ചില്‍ തുടരുകയാണ്.
ഓട്ടം കാത്തുകിടക്കുകയായിരുന്ന ആലുവ സ്വദേശിക്കു നേരെയാണ് മോഷണശ്രമം ഉണ്ടായത്. ഫോണ്‍ ചെയ്തു കൊണ്ടിരുന്ന ഡ്രൈവറുടെ അടുത്തെത്തിയ സംഘം ഇയാളുടെ കാറില്‍ ഇടിക്കുകയും ഗ്ലാസ്സ് താഴ്ത്തിയപ്പോള്‍ െ്രെഡവറുടെ പോക്കറ്റില്‍ കൈയിട്ട് ഫോണും പണവും തട്ടിപ്പറിക്കാന്‍ ശ്രമിക്കുകയുമായിരുന്നു.
ഭയന്നുപോയ െ്രെഡവര്‍ ഉടന്‍ തന്നെ വാഹനം അവിടെ നിന്ന് ഓടിച്ചു പോയി. തുടര്‍ന്ന് അതുവഴി വന്ന പോലീസ് വാഹനം കൈകാണിച്ച് നിര്‍ത്തുകയും വിവരം പറയുകയുമായിരുന്നു. സെന്‍ട്രല്‍ സി ഐ അനന്തലാല്‍, എസ് ഐ എബിയും ഉള്‍പ്പെട്ട സംഘമാണ് ട്രാന്‍സ്‌ജെന്‍ഡേഴ്‌സ് സംഘത്തെ പിടികൂടിയത്.
