കോവളം:വിഴിഞ്ഞത്തു നിന്നും കടലില്‍ പോയി കാണാതായ നാലു മല്‍സ്യത്തൊഴിലാളികളേയും കണ്ടെത്തി.പുതിയതുറ സ്വദേശികളായ ലൂയീസ് (53),ബെന്നി(33), കൊച്ചുപള്ളി സ്വദേശികളായ യേശുദാസന്‍(55) ,ആന്റണി(53) എന്നിവരാണ് തിരിച്ചെത്തിയത്.തെരച്ചിലിനുപോയ മല്‍സ്യത്തൊഴിലാളികള്‍ തന്നെയാണ് ഉള്‍ക്കടലില്‍ ഇവരുടെ ബോട്ട് കണ്ടെത്തിയത്. ക്ഷീണിതരായതിനാല്‍ നാലുപേരെയും ആശുപത്രിയില്‍ പ്രവേശിപ്പിച്ചു. വ്യാഴാഴ്ചയാണ് മല്‍സ്യത്തൊഴിലാളികളെ കാണാതായത്. ബുധനാഴ്ച വൈകിട്ട് 3.30 ഓടെ വിഴിഞ്ഞം സ്വദേശി പുഷ്പരാജന്റെ ഉടമസ്ഥതയിലുള്ള വള്ളത്തില്‍ വിഴിഞ്ഞത്തു നിന്നും മത്സ്യ ബന്ധനത്തിന് പോയതായിരുന്നു ഇവര്‍. വ്യാഴാഴ്ച രാവിലെ 10 മണിയോടെ മടങ്ങിയെത്തേണ്ടവര്‍ വൈകിട്ട് മൂന്ന് മണിയായിട്ടും വരാതായതോടെയാണ് വള്ളത്തിന്റെ ഉടമ മത്സ്യതൊഴിലാളികളെ കാണാനില്ലെന്ന പരാതിയുമായി തീരദേശ പൊലീസിനെയും മറൈന്‍ എന്‍ഫോഴ്‌സ് മെന്റിനെയും സമീപിച്ചത്.
