തിരുവനന്തപുരം:കോണ്‍ഗ്രസ് അധ്യക്ഷനും വയനാട്ടിലെ യുഡിഎഫ് സ്ഥാനാര്‍ത്ഥിയുമായ രാഹുല്‍ ഗാന്ധി ഇന്ന് വൈകിട്ട് കേരളത്തിലെത്തും.നാളെയും മറ്റന്നാളും വിവിധയിടങ്ങളില്‍ തെരഞ്ഞെടുപ്പു പരിപാടികളില്‍ പങ്കെടുക്കും.മറ്റന്നാള്‍ സ്വന്തം മണ്ഡലമായ വയനാട്ടില്‍ തെരഞ്ഞെടുപ്പ് പര്യടനം നടത്തും.ഇന്ന് വൈകീട്ട് തിരുവനന്തപുരത്തെത്തുന്ന രാഹുല്‍ നാളെ പത്തനാപുരം, പത്തനംതിട്ട, ആലപ്പുഴ, തിരുവനന്തപുരം എന്നിവിടങ്ങളിലെ തെരഞ്ഞെടുപ്പു പരിപാടികളില്‍ പങ്കെടുക്കും.
17ന് രാവിലെ ബത്തേരിയിലും,തിരുവമ്പാടിയിലും നടക്കുന്ന തെരഞ്ഞെടുപ്പ് യോഗങ്ങളില്‍ പങ്കെടുക്കും. തുടര്‍ന്ന് വണ്ടൂരിലേയും തൃത്താലയിലേയും പരിപാടികളില്‍ പങ്കെടുത്ത ശേഷം രാത്രിയോടെ തിരിച്ച് പോകും.
നാമനിര്‍ദേശപത്രിക സമര്‍പ്പിക്കാനെത്തിയ രാഹുല്‍ ഗാന്ധി വയനാട്ടില്‍ റോഡ്‌ഷോ നടത്തി യുഡിഎഫ് പ്രവര്‍ത്തകര്‍ക്ക് ആവേശം പകര്‍ന്നാണ് തിരിച്ചുപോയത്.വയനാടുകൂടാതെ അമേഠിയിലും രാഹുല്‍ മല്‍സരിക്കുന്നുണ്ട്.
