ആപ്പിള്‍ ഐഫോണ്‍ X ആഗോള വ്യാപകമായി വിപണിയില്‍ എത്തിയിരിക്കുന്നു.മറ്റ് ആപ്പിള്‍ ഫോണുകളെപ്പോലെതന്നെ മികച്ച അഭിപ്രായമാണ് ഐഫോണ്‍ Xനും ലഭിക്കുന്നത്. ഐഫോണിന്റെ ആദ്യത്തെ ഒ എല്‍ ഇ ഡി ഡിസ്‌പ്ലേ ഫോണ്‍ എന്നതാണ് ഐഫോണ്‍ X ന്റെ പ്രധാന പ്രത്യേകത.
ഈ പ്രത്യേകത ഞെട്ടിച്ചുവെന്നാണ് ഇപ്പോള്‍ പ്രമുഖ ഫോണ്‍ ഡിസ്‌പ്ലേ നിരൂപകരായ ഡിസ്‌പ്ലേ മേറ്റ്‌സ് പറയുന്നത്. ഇതുവരെ ഇറങ്ങിയതില്‍ ഏറ്റവും മികച്ച സ്മാര്‍ട്ട്‌ഫോണ്‍ ഡിസ്‌പ്ലേ എന്നാണ് ഇവരുടെ വിലയിരുത്തല്‍. അപ്പിളിന് മാത്രമല്ല ഈ ഒ എല്‍ ഇ ഡി ഡിസ്‌പ്ലേയ്ക്ക് വേണ്ടി പാനല്‍ വിതരണം ചെയ്ത ആപ്പിളിന്റെ ബദ്ധവൈരികളായ സാംസങ്ങിനും നല്‍കുന്നു ഇവര്‍ അഭിനന്ദനം.
ഐഫോണ്‍ X ഡിസ്‌പ്ലേ പരിശോധിച്ച ഡിസ്‌പ്ലേ മേറ്റ്‌സ് പറയുന്നത് ഇങ്ങനെ, കൃത്യതയും പ്രകടനവും ഒത്തുചേരുന്ന ഏറ്റവും മികച്ച ഡിസ്‌പ്ലേയാണ് ആപ്പിള്‍ ഉണ്ടാക്കിയിരിക്കുന്നത്. ഫോണിന്റെ പാനല്‍ സാംസങ്ങ് ആണ് നിര്‍മ്മിച്ചെങ്കിലും സ്‌ക്രീനിന്റെ സ്‌പെസിഫിക്കേഷനും, ക്യാലിബറും തീരുമാനിച്ചത് ആപ്പിളാണ് എന്നത് പ്രധാനകാര്യമെന്ന് ഡിസ്‌പ്ലേ മേറ്റ്‌സ് പറയുന്നു.
ആപ്പിള്‍ X സ്‌ക്രീന്‍ പരിശോധിക്കാന്‍ മൂന്ന് പ്രത്യേക ടെസ്റ്റുകള്‍ നടത്തിയെന്നും ഇതില്‍ എല്ലാം മികച്ച പോയന്റാണ് ആപ്പിളിന്റെ പുതിയ ഫ്‌ളാഗ്ഷിപ്പ് മോഡല്‍ നേടിയത് എന്ന് ഡിസ്‌പ്ലേ മേറ്റ്‌സ് പറയുന്നു.
